Pro 27 | WSK | STEP | Ni ukirok se mel bo bitarko balu ale me ko nimi patawurko. Mu awuk, ni anapeya aitakta ni kema ko aratukko mu ni me ko ikisam.

Proverbs 27

Bagara aolak ko sinar den saki

1 Ni ukirok se mel bo bitarko balu ale me ko nimi patawurko.
Mu awuk, ni anapeya aitakta ni kema ko aratukko mu ni me ko ikisam. ^{▼▼Pro 27:1 James 4:13-16 ago arikko.}
2 Kari sang la nika nip patawomonko.
Ni keta ka nip me patawurko.
3 Manga se saun mu nunga ikup mu bibiya tala.
Bare kari bo ikia ningo bo nukote mena,
mu ko ikup kariimet nungarso beteso mu manga se saun nunga ikup mu kiaram.
4 Nangamang magara ko kilek mu kariimet saki nongomang maguwuso ale ikup nungarso.
Bare bo ko mel ko namatam barasa se nangamang magara mu mel memek nunguningkiri,
mu nangamang magara ko munan mu kiaram.

5 Ni ka bo kilek diram me beteso, se ni dogowa ilup ale kilek ningo kasuru tuiko,
mu ni kilek ningo betesam.
Ni am nu ariwer se nu ni me ko kuesam iwita ikiok bore ko.
6 Ka singsang yawara mu ni te giris palageko ka momon ale yaman kisimonko.
Bare ka kager kari mu ka kueruk ale ka yasurukko, bare mu ko ninguru sinar toko!
7 Ni na nasam se tagu lagoso, mu ni mel ko na yaman nuam agi wore ni am mesam.
Bare kam ni na ko kuesam, mu mel seselak ago bare ni yaman nuam iwita am nasam.

8 Kari ko wonong beteso ale ngual ngual geraga lagoso,
mu nu inanganang ko singir beteso ale ngual ngual binga lagoso wore turan.
9 Yu gureng ko siring yawara, se ali diriyam nangimik te sapasan, mu amilmil nangarso.
Uwutatala, anananga singsang munak ikia yawara yawara nangarak munakasan mu te ana amilmil nangarsan.
10 Ni ka singsang yawara se ka niamniet nunga singsang yawara biring me nungaruko.
Tom ni ikup bo arik, mu ka launuria awar lagasan wore ka sangarmonko den me bitarko.
Mu kari nikerak pingi bagoso mu ka sangukko terong mam.

11 Aga kuriang, ni ikia ningo ningo ago terong me, se ani angamang amilmilurukko.
Se tom ani kari bo den te aga atumok ale aga balu maguwurok,
mu ani ni te se noko den koma yawara balu tuekko.

12 Kari bo ikia ningo ago, mu nu ikup koma ko tairukko negawoso mu ko ikiso ale kiaso.
Bare kari ikia ningo nongote mena, mu ikup nomoke ko taiwoso mu me ko ikisan,
ale am te nama sorasan ale ikup gisan.
13 Awiriya kari bo kigilik ko ikup nu koma kutuwurokko balso, mu nu ko ikia mena.
Mu awuk, nu kota ko kawam te melmasak suen la mu kari ikup kote beteman mu tairuk gi sapurukko.
Se ni uwutata me bitarko. ^{▼▼Pro 27:13 Bala bo mu Proverbs 20:16 ko footnote mu te arikko.}

14 Ni ka bo tumong biyala aniwoso se kote namasam ale sail ago arusam ale turomola yawara tusam,
mu noko ikia te mu ni gemang alis ago nu turomola yawara tusam iwita.
15 Kari bo ko nuwus nu iningiruk munakurukko ko imet,
mu noko kiwem umutang mu kawam gul baraka mu te tuwik kawam naung ningi pok pok kapa lagoso iwita.
16 Se ko kuari munan mu kalok ale menawurokko me terong.
Mu nu kari daula taiso se kalok ale iluwok se me namurukko ago kaeso iwitata;
se aking nu kari kota ko kuting te yu utuok ale giokko ago kaeso iwitatala.

17 Kari ilagala nunga ikia te lagurukko ikia ningo nunumi kasursan,
mu nuna batir ilagala, se kari bo, ko bo ko mu kore iluso,
se ko bo mu noko mu kore iluso iwitatala.
18 Kari tam fig ko ninguru sinar taso,
mu nu tam fig mu ko nunguning sang naukko.
Uwutatala, ni kari nika bitaruwara mu ko sinar yawara to,
mu nu nika nip patawuruk ale koma yawara kisokko.
19 Ni ka kema motam aguwaya umu te arikko, mu ni yu ningi loagasam ale arigisam.
Uwutatala, ni kari aguwaya mu te nimi ikiko, mu ka ikia, ka gemang, ka bagara aolak mu ninguru ko kutek me ale ko iki saparko.

20 Kari kueman ale kuera kuwim te namaman, bare me ago terong maman,
kuwim aromemek am aniso.
Uwutatala, ni ka ikia ka gemang mel awilaya giem se tairam, bare ni am bo agotala giko kaesam.
21 Tama mu silver se gold kai arigiso, mu gold nunguning agi mena agi wore te ariga ko.
Uwutatala, nainip patowasan ale den yawara nago ko balsan,
mu ana den mu te nainimi patowanak agi, nainimi ira kutuwunak agi, wore ko ira ariga nangate taiso.
22 Ni kari ikia ningo bo nukote mena wore moa lager se kuerukko pingi aruk ta,
bare ko ikia ngualara mu am kote anirukko.

23 Ni ka sipsip ka belelek ninguru nunga sinar toko.
24 Mu awuk, manga mel yawara yawara mu tom suen biya me ani lagurukko,
se ka nip biya ago bagara mu betelatala tom suen biya me anirukko tala.
25 Tom sirsir tarigiso kaleloso, mu batutumur ale bolala awur se ka sipsip belelek no se te bagomonko,
se kurek iru kuwim te pagukko.
26 Se sipsip mone batutumur gi ale ka guang te nunguruko;
ale ka belelek sang dier ale manga to ale aking ali iru te dierko.
27 Se ka belelek sang mu nunga amin itup,
ale ni ka imet kuriang ago no se,
sang ka ura imet alo nungaru gurugu se namonko.